Gudoomiyaha Ahna Murashaxa Madaxweyne Ee UCID Eng Faysal Cali Waraabe Oo Maanta Ka Qeyb Galay Xaflad Lagu Caleemo Saarayay Suldaan Axmed Iid Suldaan Muuse Jaamac Goodaad .
Gudoomiyaha ahna Murashaxa Madaxweyne ee UCID Eng faysal Cali Waraabe ayaa maanta ka qeyb galay xafladda caleemo-saarka Suldaan Axmed Iid Suldaan Muuse Jaamac Goodaad oo lagu caleemo saaray deegaanka jirjir ee Gobolka Awdal .
Waxaana ka soo qeyb galay Haldoorka Culimada iyo Madax-Dhaqameedka Dalka Somaliland, iyadoo halkaasna laga jeediyay khudbado ku tacalluqa Dardaaraanno kala gaddisan oo loo jeedinayay suldaanka Cusub ee Suldaan Axmed Iid Suldaan Muuse Jaamac Goodaad .
Sidoo kale Waxaa Dhamaan masuuliyiintii isugu jiray, Madax-Dhaqameedka, Culimada, Madaxda Xukuumadda, Madaxda Axsaabta ay dhamaantood ku dheeraadeen Taarikhdii dahabiga ahayd ee uu lahaa Marxuum Suldaan Muuse Jaamac Goodaad, oo ka mid ahaa tiirarkii ugu waawayna ee doorka wayn ka qaatay Dhismaha Qaranka Somaliland .
Gudoomiye Fasyal Cali Waraabe ayaa halkaasi ka jeediyay khudbad Dhinacyo badan taabanaysay, waxaanu ka waramay taarikhdii uu lahaa Maruxum Suldaan Muuse Jaamac Goodaad oo ah suldaanka maanta la caleemo saaray aabihii, Waxaanu Gudomiyuhu sheegay in uu Marxuumka ahaa xalaal-cun, Waxaanu Suldaanka Cusub ku dardaaray in uu noqdo Xalaal-cun, isla markaana raaco dhabbadii iyo raadkii wanaagsana ee aabihii Marxuum Suldaan Muuse Jaamac Goodaad .
